| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 34.5 | Dem. 34.8 (English) | >>Dem. 34.10 |
34.7δέον δʼ αὐτὸν καταγοράσαι φορτία Ἀθήνηθεν μνῶν ἑκατὸν δέκα πέντε , εἰ ἔμελλεν τοῖς δανεισταῖς πᾶσι ποιήσειν τὰ ἐν ταῖς συγγραφαῖς γεγραμμένα , οὐ κατηγόρασεν ἀλλʼ ἢ πεντακισχιλίων καὶ πεντακοσίων δραχμῶν , σὺν τῷ ἐπισιτισμῷ · ὀφείλει δὲ ἑβδομήκοντα μνᾶς καὶ πέντε . ἀρχὴ μὲν οὖν αὕτη ἐγένετο τοῦ ἀδικήματος , ὦ ἄνδρες Ἀθηναῖοι · οὔτε γὰρ τὴν ὑποθήκην παρέσχεν οὔτε τὰ χρήματʼ ἐνέθετʼ εἰς τὴν ναῦν , κελευούσης τῆς συγγραφῆς ἐπάναγκες ἐντίθεσθαι . καί μοι λαβὲ τὴν συγγραφήν .ἐλθὼν τοίνυν εἰς τὸν Βόσπορον , ἔχων ἐπιστολὰς παρʼ ἐμοῦ , ἃς ἔδωκʼ αὐτῷ ἀπενεγκεῖν τῷ παιδὶ τῷ ἐμῷ παραχειμάζοντι ἐκεῖ καὶ κοινωνῷ τινί , γράψας ἐν τῇ ἐπιστολῇ τό τε ἀργύριον ὃ ἐδεδανείκειν καὶ τὴν ὑποθήκην , καὶ προστάξας , ἐπειδὰν τάχιστα ἐξαιρεθῇ τὰ χρήματα , ἐξετάζειν καὶ παρακολουθεῖν , τὰς μὲν ἐπιστολὰς οὐκ ἀποδίδωσιν οὗτος ἃς ἔλαβεν παρʼ ἐμοῦ , ἵνα μηδὲν εἰδείησαν ὧν ἔπραττεν οὗτος , καταλαβὼν δʼ ἐν τῷ Βοσπόρῳ μοχθηρὰ τὰ πράγματα διὰ τὸν συμβάντα πόλεμον τῷ Παιρισάδῃ πρὸς τὸν Σκύθην καὶ τῶν φορτίων ὧν ἦγεν πολλὴν ἀπρασίαν , ἐν πάσῃ ἀπορίᾳ ἦν · καὶ γὰρ οἱ δανεισταὶ εἴχοντο αὐτοῦ οἱ τὰ ἑτερόπλοα δανείσαντες .
Συγγραφή
Ἀπογραφή
Μαρτυρίαι
34.8
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 34.5 | Dem. 34.8 (English) | >>Dem. 34.10 |
